星期五, 1月 17, 2014

學好三年、學壞三日

客家諺語: 學好三年,學壞三日 【要把一個人教好可能要花三年,但一個人要學壞只要三日。】

會計師公會就「監管上市公司核數師的改革建議」向所有會員發出網上意見調査 (Online survey)! 我就塡咗,唔知各會員交咗未!

就我個人所見,好多會計師見到呢份嘢之後,不論係有直接利益關係嘅上巿公司核數師、看似無乜關係嘅非上巿公司核數師、以及表面睇完全無關係嘅商界會計師,都非常擔心,其擔心程度尤如共產黨明天就全面接收香港,接管香港所有行政、立法、司法權力一樣。

的而且確,今次改革建議係衝住會計師公會現行六大監管功能(即註冊、審查、調查、紀律處分、持續專業進修及準則制訂) 而來,但今次只限於監管上市公司核數師而已。不過,好多會計師就好擔心落實咗今次呢個方案之後,財務匯報局 (FRC) 就必定會進一步走向全面監管所有會計師。係咪會咁我就唔知,但小弟愚見係,上市公司核數師的而且確有需要受到監管!

我入行2x年,見過、聽過上市公司爆煲無數,除咗某幾位直接協助上市公司做假數嘅會計師被刑事起訴後,再由公會跟進釘牌,公會絕少主動或成功對上市公司核數師作出調查或責罰。唔好話行外人,就連我呢個局內人,都曾經無數次質疑公會係咪永遠唔敢郁四大會計師行?

就以最近肥胡 (胡定旭) 單嘢為例, 「專業行為不當,沒有遵守會計師獨立性的要求」證據確鑿,會計師公會紀律聆訊竟然玩咗十年, 係足足十年呀! 我聽完心中不其然泛起DLLM 四個英文字! 最令人爭議係案發時肥胡做EY坐館時唔郁佢,依家肥胡都無做會計師啦,會計師公會今日釘一個唔再需要會計師牌嘅人個會計師牌,其實有乜實質作用? 我會想呢個case如果交由財務匯報局 (FRC)著手調查,肥胡醫管局十年皇朝根本就不存在!


再講遠啲,當年「雅佳 」、「廣南」爆煲,點解無人要負責? 「廣南」核數師爆煲後竟然withdraw已經簽發咗嘅核數師報告都無事,會計師公會事後至今一句解釋都無,其監察透明度了勝於無,比我感覺又係由四大會計師行要員揸旗嘅會計師公會永遠唔會郁四大會計師行! 假若日後審查、調查權力交到財務匯報局 (FRC) 手,麻煩翻查一下呢類案件。

上市公司核數師由會計師公會自行監管,確實需要改革! 至於點改至好,是否將現行六大監管功能(即註冊、審查、調查、紀律處分、持續專業進修及準則制訂)通通交到財務匯報局 (FRC) 手,就緊係唔得啦, 例如註冊、紀律處分、持續專業進修及準則制訂等等,應該保留,而審查及調查交給財務匯報局 (FRC)著手處理及向外公報調查結果!

至於那個「財匯局可於收集部分資料,如正在調查的資料後,通知公
暫停對會計師事務所或個人會員的首次註冊或註冊續期」建議,就低能兼白痴,呢個擺到明叫未審先判,點可能係香港發生?

2 則留言:

Lisa 說...

原來是客家話來的, 從來唔知 :)

seikomatic 說...

刪門打仔定要外人打…俺反對

抽去祠堂當眾打就夠,透明度姐。